Ота жасау бөлімшесі

Оталау бөлімшесінде стационар пациенттеріне тәулік бойы шұғыл және жоспарлы хирургиялық көмек көрсетеді. Бөлімше құрамында шұғыл, жоспарлы, ангиографиялық, мамандандырылған ЛОР, травматологиялық, ортопедиялық және нейрохирургиялық оталау блоктары жұмыс істейді. Сонымен қатар, буындарды эндопротездеуге, артроскопиялық араласуларға, күйік және іріңді-травматологиялық патологияларға арналған оталау бөлмелері, сондай-ақ күндізгі стационар жағдайындағы шағын хирургиялық араласулар мен манипуляциялар жүргізілетін оталау бөлмелері қызмет етеді. Қазіргі уақытта ауырсыну нейрохирургиясы бөлімшесіне арналған жаңа оталау блогын ашу жұмыстары жүргізілуде.

Оталау бөлімшесі келесі бағыттар бойынша пациенттерге қызмет көрсетеді: нейрохирургия, жалпы хирургия, офтальмология, гинекология, травматология және ортопедия, оториноларингология, жақ-бет хирургиясы, кардиохирургия және тамыр хирургиясы.

Бөлімше күрделі және аз инвазивті оталарды жүргізуге мүмкіндік беретін заманауи жоғары технологиялық медициналық жабдықтармен қамтамасыз етілген. Жұмыс барысында эндоскопиялық жүйелер, ота микроскоптары, нейромониторинг жүйелері, Philips ангиографиялық қондырғылары, ультрадыбыстық жүйелер, УДЗ аппараттары, радиожиіліктік деструкцияға арналған жабдықтар, сондай-ақ нейрохирургиялық оталарға арналған роботтандырылған жүйе қолданылады.

Бөлімшеде барлық хирургиялық бағыттар бойынша заманауи жоғары технологиялық оталар жасалады. Жыл сайын тәулік бойғы стационарда шамамен 20 000 ота орындалады, ал күндізгі стационарды қоса есептегенде жылына 24 000-нан астам оталық араласу жүргізіледі.